Edhe BE-ja e ashpër ndaj Kosovës: Mbyllja e strukturave paralele, veprime që nxisin tensione

Xhelal Svecla, FB

Bashkimi Evropian të dielën në mëngjes nga Shërbimi i Veprimit të Jashtëm të BE-së (EEAS) ka lëshuar një deklaratë ku shpreh shqetësimin me aksionet e Policisë së Kosovës për mbylljen e strukturave paralele serbe në disa qytete.

“Bashkimi Evropian nënvizon me shqetësim të thellë operacionet e Policisë speciale në zyrat e institucioneve të udhëhequra nga Serbia në komunat e Dragashit, Pejës, Istogut dhe Klinës si dhe në objektet e organizatës joqeveritare Qendra për paqe e tolerancë në Prishtinë. Mbyllja e papritur e këtyre zyrave do të ketë efekte negative për kushtet jetësore të përditshme për komunitete e serbëve të Kosovës, dhe do të kufizojë qasjen e tyre në shërbimet bazike sociale duke pasur parasysh mungesën e alternativave alternativave në këtë moment”, thuhet në këtë deklaratë të lëshuar nga zëdhënësi, Peter Stano.

Tutje Stano thotë se këto veprime nxisin tension dhe statusi i zyrave paralele duhet të zgjidhet në dialog.

“Statusi i këtyre strukturave është paraparë të zgjidhet përmes dialogut të lehtësuar nga BE-ja, në lidhje me themelimin e Asociacionit/Bashkësisë së komunave me shumicë serbe. Prandaj BE-ja kërkon nga Kosova që t’i evitojë veprimet e njëanshme të cilat mund të nxisin tensione dhe t’i adresojë këto çështje përmes dialogut të lehtësuar nga BE-ja”.