Edhe një ekip serb nuk lejohet të hyjë në Kosovë

Skuadrat serbe duan të luajnë pa leje në Kosovë, derisa një tjetër nuk është lejuar të hyjë, madje skuadra serbe nuk u nis fare, pasi kuptoi vendimin e Policisë

Policia e Kosovës nuk ka lejuar që në vendkalimin kufitar në Brnjak të Zubin Potokut të futet skuadra e të rinjve Ras nga Novi Pazari.

Pionierët dhe kadetët e kësaj skuadre në Mitrovicën e Veriut do të luanin me moshatarët e tyre të “Trepçës”, përkatësisht “Poletarac”, raportojnë mediat në Kosovë, përcjell albinfo.ch.

Mediet serbe shkruajnë se në kuadër të javës së tretë të Ligës ndër regjionale ishte planifikuar të zhvillohet edhe ndeshja Trepça-Novi Pazar, por skuadra serbe as nuk është nisur fare, pasi e ka kuptuar se nuk do të lejohej të hynte në Kosovë.

Trajneri i skuadrës “Poletarac” nga Mitrovica e Veriut, Sasa Trpkovic, ka thënë për “Kosovo Online” se ky vendim është i pakuptueshëm.

“Është e pakuptueshme që fëmijëve t’u ndalohet të luajnë e të shoqërohen. Na mbetet që të gjitha ndeshjet t’i zhvillojmë jashtë Kosovës si mysafirë. A thua sportistët tanë nuk e kanë merituar të kenë përkrahjen e qytetit të tyre, familjarët, shokët…”, ka pyetur Trpkovic, duke shtuar se veprime të tilla mund të ndikojnë në largimin e të rinjve, durimit të të cilëve i ka ardhur fundi.

---