Edhe sot, protesta në Maqedoni

Përveç në kryeqytetin maqedonas (Shkup), në orët e mbrëmjes janë paralajmëruar protesta edhe në Kumanovë, Ohër, Kavadar, Strumicë, Prilep, Manastir...

Në shumë qytetet të Maqedonisë edhe sot është paralajmëruar vazhdimi i protestave të opozitës kundër Qeverisë Gruevski. Përveç në kryeqytetin maqedonas (Shkup), në orët e mbrëmjes janë paralajmëruar protesta edhe në Kumanovë, Ohër, Kavadar, Strumicë, Prilep, Manastir, etj.

Protesta antiqeveritare sot do të hyjnë në ditën e katërt dhe se priten të vazhdojnë derisa të reflektojë qeveria e Maqedonisë. Në këto protesta do të protestohet për dorëheqjen e Qeverisë dhe kundër brutalitetit policor, raporton INA.

Protestat u përshkallëzuan në Maqedoni, pas konferencës së fundit për media të liderit të opozitës, Zoran Zaev, i cili publikoi audio-incizime të reja nga ajo që njihet si aferë e përgjimeve, e që kishte të bëj me vrasjen e një të riu në një miting të partisë së kryeministrit, Nikolla Gruevski.

Kjo vrasje ishte fshehur nga qeveria për shkak të përfshirjes në këtë krim të pjesëtarëve  të sigurimit të kreut të qeverisë maqedonase. Po ashtu në “bombën e 30” të Zaevit, u nxorën dëshmi për vdekjen e gazetarit të FOKUS, Nikola Mladenov, që humbi jetën dy vite më parë.

Politologu dhe analisti rus Kiril Borshev, i cili katër vite jeton në Serbi, thotë se situata në Maqedonia ka filluar t’i përngjajë asaj në Ukrainë. Në një analizë që ka publikuar në “facebook”, ai ka tërhequr paralele mes sheshit “Mejdan” në Kiev dhe Shkupit, shkruan “Dnevnik”.

Analisti  Naser Zyberi, njohës i çështjeve politike thotë se Maqedonia, tashmë nga kriza politike ka hyrë në krizë të sigurisë. Protestat, sipas tij, nuk do të ndalen nëse merren parasysh paralajmërimet e opozitës së në ditët në vijim do të publikojnë dëshmi edhe për rastet më sensitive, siç është rasti “Monstra“.

“Atmosfera skajshmërisht është e tensionuar, ajo tanimë ka eskaluar në protesta, të cilat shpesh herë janë edhe të dhunshme nga ana e policisë e cila me çdo kusht tenton ngufatjen e tyre, apo të protestuesve që dëshirojnë të shprehin revoltën e tyre. Intensiteti i protestave mendoj se do të vjen duke u rritur e jo duke u zvogëluar”, tha ai.