Ekonomia shqiptare në rritje

Në vitin 2014 rritja në Shqipëri ishte 2.1 për qind, në 2016-ën parashikohet të rritet në 3.4 për qind dhe në vitin 2017 në 3.5 për qind

Banka Botërore në raportin e fundit publikuar dje rreth ecurisë ekonomike në gjashtë vendet e Evropës Juglindore, Shqipëri, Kosovë, Mal i Zi, Serbi, Maqedoni, Bosnjë-Hercegovinë, parashikon një rritje për 2.7 për qind të Prodhimit të Brendshëm Bruto në Shqipëri, ose 0.3 për qind më pas se parashihet e Tiranës.

Në vitin 2014 rritja në Shqipëri ishte 2.1 për qind, në 2016-ën parashikohet të rritet në 3.4 për qind dhe në vitin 2017 në 3.5 për qind.

“Rritja është nxitur kryesisht nga investimet dhe eksportet neto, ndërsa konsumi privat ka mbetur i ulët, duke reflektuar besimin e ulët të konsumatorëve. Investimet private kanë përfituar nga përmirësimet e klimës së biznesit dhe nga ripagimi i një pjese të madhe të pagesave të prapambetura të qeverisë për sektorin privat”, thuhet në raportin e BB, publikuar nga shekulli.

Lidhur me rreziqet që mund të pengojnë rritjen e ekonomisë shqiptare, Banka Botërore veçon tre: “niveli i lartë i kredive të këqija që kufizon rritjen e kreditimit, çmimet e ulëta të naftës dhe kërkesa e jashtme e kufizuar”.

“Investimet e huaja të drejtpërdrejta janë rritur në mënyrë të ndjeshme gjatë tremujorit të parë të 2015-ës me rreth 53 për qind në bazë vjetore, pas rënies në tremujorin e fundit të 2014-ës. Janë shtuar edhe prurjet neto në llogaritë financiare, pavarësisht uljes së të ardhurave nga eksporti, remitancave dhe prurjeve të investimeve të huaja direkte nga Greqia”, thuhet në raport.

Borxhi publik në vitin 2015 parashikohet të rritet lehtë në 73.2 për qind të PBB-së, nga 72.5 për qind që ishte një vit më parë.

“Përpjekjet e vazhdueshme për konsolidimin e financave publike pritet ta vendosin borxhin në një trajektore zbritëse dhe ta ulin atë deri në nivelin 57.1 për qind të PBB-së deri në vitin 2019”, nënvizohet në raportin e Bankës Botërore. Shqiëria aktualisht ka një shumë të madhe borxhi që tejkalojnë shifrat e 2.7 miliard eurosh.