Ekspertja zvicerane e shëndetit: Rastet me Covid “dyfishohen çdo dy javë”

Ka pasur një rritje të konsiderueshme të infeksioneve të reja të koronavirusit në Zvicër – gati 3,000 raste u raportuan të martën, kurse mbi 4 mijë të mërkurën.

“Ato dyfishohen çdo dy javë”, sipas Virginie Masserey, drejtuese e seksionit të kontrollit të infeksionit në Zyrën Federale të Shëndetit Publik.

Vetëm pak javë më parë, Zvicra regjistroi më pak se 1000 raste ditore, por situata epidemiologjike u përkeqësua me ardhjen e motit të ftohtë, i cili i shtyu njerëzit brenda, ku virusi përhapet më shpejt.

Gjithashtu, “gati një milion njerëz në Zvicër janë ende të pavaksinuar”, tha Masserey, shkruajnë mediat zvicerane, përcjell albinfo.ch.

Megjithatë, numri i pranimeve në spital të lidhur me Covid nuk po rritet aq shpejt sa ai i rasteve të reja. “Situata në kujdesin intensiv është e qëndrueshme”, tha Masserey, që do të thotë se, të paktën për momentin, sistemi i kujdesit shëndetësor në Zvicër nuk është në prag të ngopjes.