Emiratet investojnë 32.5 milionë euro për ndërtimin e Gjinekologjisë së re në Prishtinë

Emiratet e Bashkuara Arabe kanë konfirmuar dy investime strategjike në sektorin e shëndetësisë në Kosovë, me një vlerë të përgjithshme prej 32.5 milionë euro.

Lajmi është bërë i ditur nga ambasadori i Kosovës në Emiratet e Bashkuara Arabe, Xhabir Hamiti, pas një takimi zyrtar në Abu Dhabi me Zëvendëssekretaren e Departamentit të Shëndetësisë, Dr. Noura Al-Gaithi, transmeton albinfo.ch.

Investimi më i madh përfshin ndërtimin e Spitalit të Ri të Gjinekologjisë në Prishtinë, një donacion me vlerë 25 milionë euro. Sipas ambasadorit, kanë nisur tashmë përgatitjet fillestare në koordinim me Ministrinë e Shëndetësisë së Kosovës për përzgjedhjen e lokacionit të përshtatshëm për realizimin e projektit.

Ndërkohë, investimi i dytë është i dedikuar për Spitalin “Sheikh Zayed” në Vushtrri, për të cilin janë ndarë 7.5 milionë euro. Ky projekt pritet të nisë brenda këtij viti dhe synon rinovimin e plotë të infrastrukturës spitalore, si dhe pajisjen me teknologji moderne mjekësore.

Ambasadori Hamiti ka shprehur mirënjohje ndaj lidershipit dhe popullit të Emirateve të Bashkuara Arabe, në krye me Presidentin Sheikh Mohamed bin Zayed Al Nahyan, duke theksuar se këto donacione kontribuojnë drejtpërdrejt në përmirësimin e kushteve të shëndetësisë në Kosovë.

Emiratet e Bashkuara Arabe janë shteti i parë arab që e njohu Kosovën në vitin 2008 dhe mbeten një nga partnerët kryesorë të saj ekonomikë. Kontributi i tyre në shëndetësi përfshin projekte madhore si Spitali i Fëmijëve “Sheikha Fatima” në QKUK, i inauguruar në vitin 2021 me një vlerë rreth 22 milionë euro.

Bashkëpunimi mes Kosovës dhe Emirateve është zgjeruar edhe në fusha të tjera strategjike, ndërsa nga 22 shkurti 2024, qytetarët e Kosovës udhëtojnë pa viza në Emiratet e Bashkuara Arabe. /Albinfo.ch 

---