Emocionon Besarta Jashari, rikthen në memorie ngjarjet e 5, 6 e 7 marsit 1998

E mbijetuara e vetme e sulmit të familjes Jashari, Besarta Jashari, ka risjellë sot memorie të sulmeve ndaj familjes Jashari më 5, 6 dhe 7 mars.

E bija e Hamëz Jasharit në një fjalim në akademinë përkujtimore për 26-vjetorin e Epopesë së Ushtrisë Çlirimtare të Kosovës ka tregoi detaje se si ndodhi sulmi.

“7 mars të vitit 1998, nga baba Shaban dhe babushi nuk kishim informacion, por këngën e babushit nuk e dëgjoja më, dikur edhe bali Adem u vra. Tankat e armikut u afruan shtëpisë, predhat shpërthyen muret e dhomës ku ishim, duke lënë të plagosur Hidajetin, Kushtrimin dhe Blerinën, ndërsa unë nuk kisha asnjë plagë, të gjithë të tjetër mbetëm të vdekur. U ktheva nga hyrja e shtëpisë, kur mbërrita te Hidajeti dhe Blerina nuk e gjeta Kushtrimin, i cili ishte vrarë duke luftuar pas meje. Blerina më kërkoi ujë, në momentin që u ngrita t’i marr ujë, armiqtë kishin filluar të gjuanin bomba dore, duke vrarë edhe Hidajetin dhe Blerinën”, u shpreh ajo.

E kur gjithçka përfundoi, Besarta rrëfeu edhe se çfarë e pyetën ushtarët serbë:

“Pasi më morën nga shtëpia, ata flisnin, unë nuk i kuptoja, derisa erdhi një ushtar armik që dinte shqip, ata më pyetën: ‘Ku janë Ademi dhe Hamza?’. Sot e di si do të duhej përgjigjur: “Ademi e Hamza janë dhe do të mbeten në zemrat e të gjithë shqiptarëve”, u shpreh Besarta.