Evropianët dalin me deklaratë të përbashkët pas samitit Trump-Putin

Ukraina duhet të ketë garanci sigurie, theksojnë liderët evropianë

Liderët kryesorë evropianë, përfshirë Emmanuel Macron, Giorgia Meloni, Friedrich Merz, Keir Starmer, Ursula von der Leyen dhe të tjerë, kanë publikuar një deklaratë të përbashkët pas takimit në Alaskë midis presidentit amerikan Donald Trump dhe presidentit rus Vladimir Putin. Samiti nuk prodhoi marrëveshje për armëpushim apo paqe, përcjell albinfo.ch.

Në deklaratë, liderët evropianë mirëpresin përpjekjet e Trumpit për të ndaluar luftimet në Ukrainë dhe për të arritur një paqe të drejtë dhe të qëndrueshme. Ata theksojnë se Ukraina duhet të ketë garanci të forta sigurie, pa kufizime mbi forcat e saj të armatosura, dhe se Rusia nuk ka të drejtë vetoje mbi aspiratat e saj drejt Bashkimit Evropian dhe NATO-s.

Evropianët shprehen gatishmërinë për të bashkëpunuar me Trumpin dhe Zelenskyn për një samit trepalësh, duke siguruar mbështetje të palëkundur për Ukrainën dhe duke rritur presionin mbi Rusinë përmes sanksioneve dhe masave ekonomike deri në arritjen e një paqeje të drejtë.

---