Facebooku teston butonin e ri

Gjithsesi, rrjeti social mohoi se ky opsion është ‘dislike’, të cilin e kanë kërkuar shumë përdorues

Facebooku raportohet se është duke testuar një buton të ri të “votimit poshtë” për t’i lënë njerëzit të fshehin komente dhe të marrin reagime për to.

Gjithsesi, rrjeti social mohoi se ky opsion është ‘dislike’, të cilin e kanë kërkuar shumë përdorues.

Butoni i ri po provohet te një grup i vogël i përdoruesve në SHBA.

Kompania njoftoi se do të marrë disa masa të tjera për të përmirësuar rrjetin social.

Testimi u konfirmuar për faqen “TechCrunch”. “Jemi duke testuar një veçori të re që do t’u jepte njerëzve reagime për komentet në postimet e tyre publike në faqe. Kjo po testohet te një grup i vogël i njerëzve në SHBA”, ka thënë gjiganti i internetit.

Rrjetet tjera sociale si Reddit e kanë këtë opsion kah moti me qëllim që të reduktojë shpërndarjen e një postimi, transmeton Albinfo.ch.

Kur të klikohet ky buton në Facebook, komenti i caktuar do të fshihet. Njerëzit më pas do të mund të vendosin nëse është ofendues, i pasaktë ose jashtë teme.

Megjithatë, ai nuk ndikon në shpërndarjen e postimit te njerëzit tjerë dhe nuk ndikon në rangimin në faqen bazë të Facebookut.