Familjarët e viktimave, me aeroplanë ushtarakë në Zvicër

Gjatë udhëtimit me aeroplan do t`i nënshtrohen përkujdesjes nga psikologët, ka bërë të ditur ministri belg i mbrojtjes

Familjarët e viktimave që humbën jetën në fatkeqësinë e rëndë që ka ndodhur mbrëmë në Siders të Valisit të Zvicrës, pritet të vijnë në mënyrë të organizuar nga Belgjika me dy aeroplanë ushtarakë. Aeroplanët që kanë vend për 82 udhëtarë, do të aterrojnë rreth orës 14 në Aeroportin e Gjenevës.

Të afërmit e të vdekurve pak para kohës së drekës ishin në rrugë me autobusë për në Aeroportin ushtarak të Brukselit . Është paraparë që ata gjatë udhëtimit me aeroplan do t`i nënshtrohen përkujdesjes nga psikologët, ka bërë të ditur ministri belg i mbrojtjes Pieter De Cem.

Aksidenti në Siders konsiderohet më i rëndi me autobus që ka ndodhur në 30 vitet e fundit. Më 12 shtator të vitit 1981 në një autobus të aksidentuar me turistë gjermanë kishin humbur jetën 39 udhëtarë, njoftojnë mediet zvicerane.

Belgjika dhe Zvicra janë në pikëllim të thellë për tragjedinë e rëndë. Kështu, parlamentarët e Zvicrës mbajtën minutë heshtje në sesionin e tyre të paradites. Ndërsa kryeministri belg Elio Di Rupo ka folur sot për “një ditë shumë të pikëlluar për Belgjikën”. Ministri i jashtëm belg Didier Reynders e ka përshkruar tragjedinë si “të pasqarueshme”.

Për më shumë mbi aksidentin, lexoni lajmin: “Tragjedi në Zvicër: vdesin 22 fëmijë”