Ferronikeli nuk i frikësohet as rivalit, as presionit serb

Optimizmi te skuadra nga Drenasi para ndeshjes me Slovan Bratislavën që zhvillohet sonte nga ora 18:00, nuk është duke munguar, përjell albinfo.ch.

Top-shënuesi i Superligës për edicionin e kaluar, Kastriot Rexha, në një bisedë për Zëri.info ka besim të plotë te skuadra e tij, ani pse është i bindur për cilësitë e skuadrës nga Bratislava.

“Është një ndeshje e vështirë, me një kundërshtar shumë të fortë. Do të jetë e vështirë, por ne nuk do të dorëzohemi, edhe pse kundërshtari është në një nivel tjetër”, tha fillimisht Kastriot Rexha.

Më tutje “Kaski” shpreson që fati i skuadrës që do të kualifikohet më tutje të vuloset në Prishtinë. “Mendojmë të marrim sa më shumë nga kjo ndeshje, në mënyrë që ndeshja vendimtare të jetë në Prishtinë. Ne nuk kemi ardhur këtu të dorëzuar, edhe pse e dimë se do të jetë e vështirë”, vlerësoi “bomberi” kosovar.