Fillon ndërtimi i xhamisë qendrore në Prishtinë

Kjo xhami e cila do të jetë ndër më të mëdhatë në Ballkan, do t’i ketë katër minare, ndërsa do të kushtojë rreth 20 milionë euro

Të gjithë përfaqësuesit e institucioneve, por edhe klerikët fetarë të të gjitha konfeksioneve në Kosovë, kanë marrë pjesë në ceremoninë e gurëthmelit të xhamisë qendrore në Prishtinë. Kjo xhami e cila do të jetë ndër më të mëdhatë në Ballkan, do t’i ketë katër minare, ndërsa do të kushtojë rreth 20 milionë euro. 

Kjo xhami do të ndërtohet në lagjen “Ulpiana” përball objekti të Postës dhe Telekomit të Kosovës, ndërsa do të ketë një hapësirë rreth 78 ari. Akoma nuk është caktuar mënyra se si do të financohet ndërtimi i këtij objekti kulti. 

Gurin e parë në themel e kanë vendosur bashkërisht, presidentja Atifete Jahjaga, kryeparlamentari Jakup Krasniqi, kryemyftiu Naim Tërnava, kryeministri Hashim Thaçi dhe kryetari i Prishtinës Isa Mustafa. Ndërsa të pranishëm në ceremoni kanë qenë edhe përfaqësuesit i Ipeshkvisë së Kosovës, por edhe ata të Kishës Ortodokse Serbe. 

“Kjo xhami do të shërbejë për edukimin e popullatës në përgjithësi, do të jetë në shërbim të ardhmërisë së popullit dhe vendit tonë. Do të jetë një vend ku do të mësohet, shpjegohet e kultivohet mirëkuptimi, humaniteti, toleranca, respekti, dashuria e sinqeriteti…”, ka thënë para të pranishmëve Naim Tërrnava, kryetari i BIK. 

Ndërtimit të kësaj xhamie i kishin paraprirë një varg protestash nga komuniteti mysliman, të cilit kishin kërkuar që ky objekt kulti të ndërtohet përballë Katedralës “Nënë Tereza” në oborrin e fakultetit Filologjik. Mirëpo pas konsultave ndërmjet kryetarit të Prishtinës dhe kryetrarit të Bashkësisë islame të Kosovës është arrit konsensus që xhami të ndërtohet në lagjen Ulpiana.