Shfaqet në Festivalin e Lokarnos filmi kosovar-zviceran “The Land within”

Filmi i regjisorit Fisnik Maksville shfaqet nesër, 9 gusht, me fillim në orën 10.30 në sallën Palexpo (Fevi), në kuadrin e programit "Panorama Suisse"

Nesër, më 9 gusht, në festivalin e filmit në Lokarno jepet filmi “The Land within” (Toka, brenda saj) i regjisorit shqiptar nga Zvicra Fisnik Maxville, realizuar si bashkëprodhim Kosovë-Zvicër, shkruan albinfoi.ch.

Festivali i Lokarnos bën pjesë ndër festivalet ndërkombëtare të filmit të kategorisë A, sipas përkufizimit të Shoqatës së Producentëve të Filmit FIAPF.

Filmi ka pasur një rrugë të suksesshme deri tani. Ai ka marrë pjesë në shumë festivale të mëdha botërore ndërsa ka fituar çmimin kryesor në festivalin e filmit në Talin (Estoni), i cili i takon kategorisë së parë të festivaleve botërore të filmit, shkruan albinfo.ch.. Së fundi, ky film ishte nominuar për çmimin e filmit më të mirë të Zvicrës, në festivalin kryesor të filmit në vend, në Solothurn.

Subjekti i filmit, me pak fjalë, është ky: Në vitin 2008, pas vitesh mërgimi, Remo u kthye në vendin e tij në Kosovë. Ai duhet të ndihmojë kushërirën e tij Una të zhvarros një varr masiv ku shumica e anëtarëve të familjes së saj janë varrosur gjatë luftës. Por trupat zbulojnë sekretet familjare që shtyjnë Remon dhe Unën të vënë në dyshim të ardhmen e tyre. Një film për të vërtetat e mundshme në një vend që njeh vetëm mbijetesën.

Filmi shfaqet me fillim në orën 10.30 në sallën Palexpo (Fevi), në kuadrin e programit “Panorama Suisse”.

---