Fiton Maqedonia, përfundon ëndrra e Kosovës

Maqedonia Veriore do të ballafaqohet me Gjeorgjinë në finale

Ka përfunduar ndeshja Maqedonia Veriore-Kosova, ku vendasit kanë fituar 2:1 dhe janë kualifikuar tutje. Me këtë humbje në Shkup përfundon ëndrra e Dardanëve për kualifikim në Evropian.

Maqedonia Veriore kishte kaluar në epërsi ndaj Kosovës, me anë të Ristovskit në minutën e 15-të. Ai realizoi pas edhe një devijimi nga Benjamin Kololli, shkruan albinfo.ch.

Por, Kosova barazoi shifrat në minutën e 29-të, ku realizoi Florent Hadërgjonaj, pas gabimit të portierit kundërshtar, por 4 minuta më vonë shënoi Velioski, duke kaluar sërish maqedonasit në epërsi. Pjesa e parë përfundoi 2:1 për vendasit.

Në pjesën e dytë, vendasit shënuan dy gola, por u anuluan për pozitë jashtë loje, derisa rast të artë për Kosovën kishte Fidan Aliti në minutën e 94-të.

Kjo ndeshje është e vlefshme për gjysëmfinalen e Play-offit në Ligën e Kombeve. Gjeorgjia ka mundur 1:0 Bjellorusinë dhe e priste fituesin e këtij dueli.

Finalja do të përcaktojë se kush do të shkojë në Kampionatin Evropian që zhvillohet vitin e ardhshëm në 12 shtete.

---