FSK në Kuvajt, ambasadori Kosnett: Moment historik për Kosovën

Ambasadori i Shteteve të Bashkuara të Amerikës në Kosovë ka reaguar lidhur me misionin e parë ndërkombëtar të Ushtrisë së Kosovës, duke e konsideruar moment historik.

Ai thotë se bashkëvendosja e ushtrisë së Kosovës dhe të Amerikës është moment historik jo vetëm për mbrojtjen e Kosovës, por si demonstrim i gatishmërisë së Kosovës për të marrë përgjegjësi përtej kufijve.

“Bashkëvendosja e Ushtrisë së Kosovës dhe Ushtrisë Amerikane në Kuvajt është një moment historik – jo vetëm për mbrojtjen e vetë Kosovës, por si demonstim i gatishmërisë së Kosovës për të përqafuar përgjegjësitë përtej kufijve të saj që kontribuojnë në sigurinë rajonale dhe globale”, shkruan Kosnett.

Ndërsa, Departamenti i Mbrojtjes i SHBA-së ka thënë se është krenari për SHBA-në të kenë afër vetes ushtrinë e Kosovës.

“Departamenti i Mbrojtjes (DOD) është krenar të bashkohet me Forcat e Sigurisë së Kosovës në misionin e parë në Kuvajt. Gjatë këtij misioni, partnerët tanë nga Kosova do të fitojnë përvojën e mekanikës dhe logjistikës, duke punuar me njësitë e Ushtrisë Amerikane #BashkëMëTëFortë”, shkruan Departamenti Amerikan i Shtetit.