Gjashtë qytete zvicerane kandidate për titullin “Kryeqyteti Kulturor” 2030

Qytetet zvicerane Aarau, Bellinzona, Lugano, Schaffhausen, Thun dhe Zug po konkurrojnë për t’u shpallur “Kryeqyteti Kulturor” i Zvicrës për vitin 2030. Kjo iniciativë është bërë e ditur në fund të marsit, kur çdo qytet dorëzoi një deklaratë të qëllimit për të kandiduar zyrtarisht deri në fund të vitit.

Daniel Rossellat, president i Shoqatës Zvicerane të Kryeqytetit Kulturor (CCS), deklaroi se pjesëmarrja e gjashtë ose madje tetë qyteteve në këtë garë rrit mundësinë e një zgjedhjeje më të larmishme për Kryeqytetin Kulturor 2030 dhe tregon se koncepti është tani i njohur në gjithë Zvicrën.

Kalendar i Garës

Pas dorëzimit të ofertës zyrtare deri më 31 dhjetor 2025, qytetet do të konkurrojnë për titullin “Kryeqyteti Kulturor i Zvicrës” për vitin 2030. Një juri, e përbërë nga një grup ekspertësh nga fusha të kulturës, biznesit dhe politikës, do të vizitojë qytetet kandidate në pranverë të vitit 2026, ndërsa vendimi përfundimtar do të merret në qershor 2026, transmeton albinfo.ch.

Ky projekt është pjesë e programit kulturor të qeverisë federale për vitet 2025-2028 dhe ka për qëllim zhvillimin e një dinamike të re kulturore, si dhe nxitjen e iniciativave ekonomike dhe sociale.

Përfitimet e pjesëmarrjes

Rossellat theksoi se pjesëmarrja në këtë garë do të mundësojë zhvillimin e një dinamike të re për qytetet pjesëmarrëse, përfshirë projekte urbane që do të transformojnë zonat e ndryshme në qendra kulturore të reja, transmeton albinfo.ch.

La Chaux-de-Fonds, një qytet në kantonin Neuchâtel, do të bëhet Kryeqyteti i Parë Kulturor i Zvicrës në vitin 2027, dhe kjo ka sjellë tashmë ndryshime në qytet, përfshirë rindërtimin e abattoarëve të dikurshëm për t’u shndërruar në një qendër kulturore.

Ky pilot projekt do të përsëritet çdo tre vjet për qytetet zvicerane me mbi 20,000 banorë, duke mundësuar përfaqësimin e kulturës zvicerane për një vit të plotë, duke u ofruar qyteteve mundësinë të shfaqin diversitetin dhe trashëgiminë e pasur kulturore të Zvicrës.

Ky proces synon të forcojë lidhjet kulturore të Zvicrës me qytetet dhe rajonet e tjera, duke kontribuar në zhvillimin e kulturës dhe zhvillimin ekonomik dhe social në nivel kombëtar dhe ndërkombëtar.