Gjenevë: Storie suksesi, shqiptari vlerësohet lart në fushën e Al-së

Genis Skura pa dyshim se është një nga storiet e suksesit në Zvicër, në kantonin e Gjenevës, transmeton albinfo.ch.

Ai tashmë po konisderohet si një ndër pionierët e Inteligjencës Artificiale (AI) në Zvicër.

Ai ka lindur në qytetin e Elbasanit, pas mbarimit të masterit po lë shenja suksesi në Kantonin e Gjenevës.

Thuhet se ai ka mbaruar Bachelor-in për Inxhinieri Informatike në Universitetin Politeknik të Tiranës, ndërsa Masterin dyvjeçar në Shkencat Informatike në Universitetin e Gjenevës.

Përgjatë Masterit ai ka bërë stazh midis Universitetit dhe Spitalit të Gjenevës, në aplikimin e metodave të Inteligjencës Artificiale për identifikimin dhe grumbullimin automatik të të gjitha termave mjekësore nëpër Korpuse Spitalore dhe dokumente të shëndetësisë globale.

Në një epokë kur teknologjia ka arritur shumë më shumë se sa ndonjëherë për të ndryshuar botën, suksesi dhe puna e Skuras është një ilustrim frymëzues i mundësive që ofron kjo fushe, pasi ai tani është pozicionuar si asistent kërkimor te Universiteti i Gjenevës dhe ai Pedagogjik në një lëndë të quajtur “Introduction to AI” për Fakultetet joshkencore. Pra Genisi, përveç kontributeve të tij në fushën teknike, gjithashtu po angazhohet në edukimin e brezit të ardhshëm të inxhinierëve të AI-së.

Përveç kësaj, Genisi nuk ndalet me kaq. Ai tani ka në dorë një projekt gjigant mbi metodat e Inteligjencës Artificiale në rezolutat diplomatike, juridike, si statutet ndërkombëtare e politike, siç janë fjalimet. Po ashtu dhe në metodat për lokalizimin automatik të të gjitha entiteteve, personave, vendeve, ligjeve në një tekst pavarësisht gjuhës, analiza e sentimenti i fjalimeve, shkruan Ambasada e RSH-së në Bernë.

Nga e gjithë fusha e Informatikës, Genisi zgjodhi specializimet në AI për shkak të interdisiplinaritetit. Sipas tij, kjo nuk të limiton, por të krijon mundësinë për t’u marrë e punuar në projekte të ndryshme, si në shëndetësi, financë, juridik apo diplomaci.

Sot, historia e suksesit të Genis Skura shërben si një burim frymëzimi për të gjithë ata që janë të interesuar për të ndërtuar një karrierë në fushën e Inteligjencës Artificiale. Ai është një shembull i shkëlqyeshëm i aftësive të nevojshme, përkushtimit dhe durimit për të arritur objektivat e larta dhe për të bërë ndryshime thelbësore në botën tonë nëpërmjet teknologjisë.