Gjermani: Ndërprehen disa linja hekurudhore, flitet për sabotazh

Një akt "sabotimi" që synonte infrastrukturën e komunikimit ishte fajtor për ndërprerjen e madhe në rrjetin hekurudhor gjerman të shtunën, tha operatori Deutsche Bahn.

Trafiku i trenave u ndërpre në Gjermaninë veriore herët të shtunën pas një “dështimi të sistemit radiodigjital të trenave”, tha operatori Deutsche Bahn.

Ndërprerja preku trafikun rajonal dhe në distanca të gjata në Saksoninë e Ulët, Bremen, Hamburg dhe Schleswig-Holstein dhe zgjati rreth tre orë. Ai preku gjithashtu trenat për dhe nga këto zona, duke përfshirë shërbimet midis Berlinit dhe rajoneve në perëndim dhe veri të Gjermanisë, transmeton Albinfo.ch.

Kompania shtetërore më vonë tha se ndërprerja ishte “për shkak të sabotimit të kabllove që janë të domosdoshëm për trafikun e trenave”, thuhet në një deklarate për shtyp.

“Autoritetet kompetente të sigurisë kanë filluar hetimin”, tha Deutsche Bahn.

Ministri gjerman i Transportit Volker Wissing tha se kabllot thelbësore “u shkëputën qëllimisht” në dy vende, përcjell tutje Albinfo.ch.

“Është e qartë se ky ishte një veprim i shënjestruar dhe i qëllimshëm”, shtoi ai, duke thënë se motivi nuk është “i ditur ende”. Ai e përshkroi incidentin si “qartë të paramenduar”.

Sipas kompanisë, pasagjerët që duan të shtyjnë udhëtimin e tyre për shkak të efekteve të problemit mund të përdorin biletën e tyre tashmë të rezervuar për udhëtime në distanca të gjata në mënyrë fleksibël nga tani deri në shtatë ditë pas përfundimit të problemit.

Rezervimet e vendeve mund të anulohen pa pagesë, tha DB.

Rruga Berlin-Amsterdam u pezullua gjithashtu dhe mijëra udhëtarë u bllokuan në stacionet nëpër rajonet e prekura.

 

---