Gjermania, në kufi të kapaciteteve të saj për të pranuar emigrantë

Gjermania po përballet me vështirësi për të pranuar më shumë emigrantë, tha të mërkurën presidenti Frank-Walter Steinmeier.

“Gjermania, ashtu si Italia, është në kufirin e kapacitetit të saj”, tha Steinmeier në një intervistë me gazetën italiane Corriere della Sera, duke theksuar se Gjermania kishte marrë një të tretën e të gjitha kërkesave për azil të BE-së në gjysmën e parë të 2023-ës, shkruan DW.

Presidenti pranoi se si Italia, ashtu edhe Gjermania kishin “ngarkesa të rënda për të mbajtur” dhe bëri thirrje për një “shpërndarje të drejtë” të barrës migratore brenda Evropës.

Autoritetet italiane kanë nisur së fundmi transferimin e disa emigrantëve në Siçili nga ishulli më i vogël i Lampedusa, i cili po pushtohet nga shifra rekord mbërritjesh.

Për të kufizuar numrin e njerëzve që vijnë në Evropë, Steinmeier tha se nevojiteshin “kontrolle dhe mbikëqyrje më të forta në kufijtë tanë të jashtëm”, përcjell albinfo.ch.

Presidenti gjerman theksoi se Italia nuk duhet të lihet vetëm në çështjet e migracionit dhe falënderoi vendin që ka treguar “aq shumë përgjegjësi humanitare”.

Qeveria e krahut të djathtë e Italisë është kritikuar për miratimin e dekreteve që frenojnë të drejtat e emigrantëve dhe pengojnë misionet jofitimprurëse të shpëtimit në det, shkruan DW.

Steinmeier i kërkoi gjithashtu qeverisë italiane dhe gjermane të negociojnë një marrëveshje për mosmarrëveshjen e tyre aktuale mbi këtë çështje.

Javën e kaluar, Gjermania pezulloi pranimin vullnetar të emigrantëve nga Italia deri në një njoftim tjetër. Ministria e Brendshme tha se Italia vetë po refuzonte të merrte mbrapsht personat për të cilët Roma është përgjegjëse për procesin e azilit sipas ligjit të BE-së, përcjell albinfo.ch.

Disa politikanë gjermanë kanë propozuar së fundmi një kufi për numrin vjetor të emigrantëve dhe azilkërkuesve.

Kreu i opozitës konservatore Friedrich Merz ka thënë se ky numër duhet të vendoset në 200,000 në vit. Ministrja e Brendshme, Nancy Faeser, e socialdemokratëve të kancelarit Olaf Scholz, e ka hedhur poshtë një kufi të tillë, shkruan DW.

Sipas shifrave zyrtare, Gjermania ka marrë rreth 175,000 kërkesa për azil në vitin 2023, duke përjashtuar ukrainasit. Gjermania ka pranuar më shumë se 1 milion refugjatë nga Ukraina, të cilët kalojnë një proces të posaçëm azili që BE-ja prezantoi në dritën e luftës së Rusisë.

Ndërkohë, qeveria gjermane po kërkon të tërheqë emigrantë për të plotësuar rreth 2 milionë vende pune. Ligjvënësit votuan në qershor në favor të reformimit të ligjit të imigracionit të punës së kualifikuar, përcjell albinfo.ch.