Gjermania shqyrton angazhimin e policëve me prejardhje të huaj

Kryesuesi i DStGB-së ka thënë se po bëhen përpjekje për rritjen e numrit të personelit me sfond të huaj. “Një polic që ka prejardhje jogjermane është e pritshme që të jetë në gjendje t`i zgjidhë më lehtë problemet në mes të refugjatëve”, ka thënë ai

Gjermania shqyrton mundësinë e angazhimit të shtuar të policëve me prejardhje të huaj. Këtë synim konkretisht e ka shprehur Bashkësia e Qyteteve dhe Komunave të Gjermanisë (DStGB), e cila dëshiron edhe prani më të madhe të të huajve përgjithësisht në shërbimet publike.

Kryesuesi i DStGB-së ka thënë për die Welt se po bëhen përpjekje për rritjen e numrit të personelit me sfond të huaj, transmeton albinfo.ch. “Një polic që ka prejardhje jogjermane është e pritshme që të jetë në gjendje t`i zgjidhë më lehtë problemet në mes të refugjatëve”, ka thënë ai.

Ndërkaq grupi parlamentar i CDU/CSU në Bundestagun Gjerman ka shprehur rezerva lidhur me këtë propozim. “Natyrisht që policia duhet të jetë një pasqyrë e realitetit në shoqëri”, ka thënë për “Die Welt” Kai Wegner, përgjegjës për qytetet e mëdha të Gjermanisë në këtë grup. Dhe sigurisht, përvojat si migrantë dhe kompetencat ndërkulturore të tyre do të ishin të dëshirueshme. Por kjo nuk do të thotë që ne të bëjmë lëshime sa u takon standardeve dhe parakushteve që duhen plotësuar për një punë të tillë ka thënë ai, përcjell albinfo.ch.

“Shtetësia gjermane, zotërimi i sigurt i gjuhës gjermane dhe një përkushtim i qartë ndaj rendit tonë juridik duhet të jenë parakushtet”, ka thënë ai.