Gjermania vendos: 6 miliardë euro për refugjatët dhe shpall “të sigurta” 3 vendet ballkanike

Koalicioni ka vendosur edhe për shpalljen e Kosovës, Shqipërisë dhe Malit të Zi si "shtete të sigurta"

Koalicioni i madh CDU-SPD ka arritur marrëveshjen për të shtuar edhe gjashtë miliardë euro në buxhetin e vitit 2016 me destinim strehimine refugjatëve. 3 miliardë do të jetë më i madh buxheti federal dhe po ashtu tre miliardë ai i landeve dhe i komunave që do të jetë në dispozicion për përkujdesjen dhe strehimin e refugjatëve.

Vetëm për pjesën e mbetur të këtij viti, lihen në dispozicion për çështje të azilit 1 miliard euro.

Kjo është pjesë e pakos për të cilën janë marrë vesh krerët e koalicionit gjatë takimit të mbajtur natën në mes të të dielës dhe të hënës në Berlin.

Krahas shtimit të mjeteve, shefat e partive të koalicionit janë marrë vesh edhe për masa të tjera që shkojnë drejt ashpërsimit të rregullave që duhet t`u përmmbahen azilkërkuesit, shkruan welt.de., transmeton albinfo.ch. Ndër to bën pjesë zëvendësimi i ndihmave në të holla në ndihma “në natyrë” (ushqime dhe artikuj të tjerë në vend të parave).

Do të reduktohen edhe ndihmat për azilkërkuesit pa status “Duldung”

Në kuadrin e marrëveshjes hyn edhe shpallja e Kosovës, Shqipërisë dhe Malit të Zi si “shtete të sigurta të prejardhjes”. Për t`u bërë kjo nevojitet ndryshimi i ligjit përkatës dhe i shërben qëllimit për riatdhesimin sa më të shpejtë të refugjatëve që vijnë nga këto shtete. Por, si kundërmasë, gjashtë shtetet e Ballkanit do të fitojnë më shumë të drejta pune në Gjermani për shtetasit e tyre. Sipas masave të reja “ai që mund të dëshmojë një kontratë pune ose kualifikimi/praktike me kushtet e vlefshme në tregun gjerman të punës do të ketë të drejtë pune ose kualifikimi

Megjithë marrëveshjen e arritur në nivelet më të larta të partive, vendimi përfundimtar do të merret më 24 shtator në takimin e përfaqësuesve të federatës me ata të landeve. Ndërsa Parlamenti do të votojë në muajin tetor.