Gjermania zgjat edhe për tre muaj të tjerë kontrollet kufitare

Afati për kontrollimin kufitar i caktuar në fillim të vitit dhe i cili duhej të përfundonte në mesin e shkurtit, do të zgjatet edhe për tre muaj të tjerë. Ai pritet të përfundojë më 13 maj

Qeveria Federale e Gjermanisë do të zgjasë afatin për kontrollimin në kufijtë e shtetit. Këtë qëndrim Berlini zyrtar e ka marrë duke u mbështetur në faktin se po vazhdon me ritëm të njejtë fluksi i refugjatëve.

Afati për kontrollimin kufitar i caktuar në fillim të vitit dhe i cili duhej të përfundonte në mesin e shkurtit, do të zgjatet edhe për tre muaj të tjerë, shkruajne mediet gjermane. Ai pritet të përfundojë më 13 maj.

Ministri i brendshëm gjerman Thomas de Maiziere e sheh të domosdoshëm vazhdimin e kontrolleve në kufij, transmeton albinfo.ch. Kjo për faktin se vetëm në këtë mënyrë sigurohet një procedurë e rregullt e hyrjes së të huajve në vend dhe po ashtu mundësohet siguria e brendshme dhe rendi publik.

Pika neuralgjike në këtë kontekst vazhdon të mbetet në kufirin e Gjermanisë me Austrinë.

Për vazhdimin e afatit për ushtrimin e kontrollit kufitar Qeveria e Gjermanisë ka njoftuar zyrtarisht shtetet fqinje, Komisionin e BE-së dhe shtetet tjera, anëtare të Shengenit.