Gjithçka gati për koncertin spektakolar në Tiranë

70 instrumentistët nga të gjitha trevat shqiptare, së bashku me maestron, Shkëlzen Doli do të performojnë para publikut shqiptar

Gjithçka është gati për koncertin e Shkëlzenit Dolit, që do të zhvillohet të shtunën në sheshin “Skënderbej” në Tiranë. 70 instrumentistët nga të gjitha trevat shqiptare, së bashku me maestron, dhe korin janë duke punuar, që gjithçka të shkojë siç është më së miri.

“Tani sapo kemi filluar provat të bashkuar dhe orkestra ka filluar, ka një kohë të gjatë që janë duke punuar. Uroj që ky koncert të jetë si një fillim i një riparimi të muzikës autoktone shqiptare”, deklaroi Shkëlzen Doli, violinist, raporton “TCH”.

“Valsi i lumturisë”, “Arbëreshës sime”, apo “Potpuri korçare”, do të jenë disa nga ‘magjitë’ që do të prezantohen para publikut shqiptar.

“Do të jene dy anëtarë të Filarmonisë së Vjenës: Walter Auer, flautist, dhe Sebastian Bru, udhëheqësi i violinçelave. Do jetë edhe pianisti italian që jeton në Vjenë, Luca Monti. Do të jemi 4 solistë që do të shoqërohemi nga kjo orkestër mbarëshqiptare”, theksoi më tutje Shkëlzen Doli, përcjell albinfo.ch.

Që prej 21 shtatorit, në sheshin “Skënderbej” po bëhen përgatitjet e fundit për një shfaqje të madhe, që pritet të shndërrohet traditë në vazhdimësi.

Biletat për këtë koncert kanë dalë në shitje në Tiranë, Prishtinë e Shkup, derisa pritet që edhe një numër i madh i turistëve të vijnë për këtë koncert.