“Gjithë të mirat Kosovë”, ambasadori i BE-së përmbyll mandatin me mesazh nga aeroporti

Aivo Orav publikon fotografi lamtumirëse nga Aeroporti Ndërkombëtar i Prishtinës pas përfundimit të detyrës në Kosovë

Diplomati estonez Aivo Orav, i cili ka shërbyer si ambasador i Bashkimit Evropian në Kosovë, ka përmbyllur zyrtarisht mandatin e tij me një mesazh të shkurtër, por domethënës, përcjell albinfo.ch.

Përmes një postimi në platformën X, ai ka publikuar një fotografi nga Aeroporti Ndërkombëtar i Prishtinës, duke i dhënë lamtumirën vendit ku shërbeu për disa vite.

“Gjithë të mirat Kosovë”, ka shkruar ai krahas fotografisë, duke shprehur kështu përshëndetjen e fundit ndaj vendit dhe qytetarëve.

Gjatë mandatit të tij, Aivo Orav ka qenë i angazhuar në forcimin e marrëdhënieve ndërmjet Bashkimit Evropian dhe Kosovë, si dhe në mbështetjen e proceseve demokratike dhe reformave në vend.

Largimi i tij shënon përfundimin e një kapitulli diplomatik, ndërsa pritet emërimi i një përfaqësuesi të ri të BE-së në Kosovë./Albinfo.ch 

 

---