Gjithnjë e më shumë refugjatë ukrainas po arrijnë në Zvicër

“Fluksi është ende i madh, deri në mbrëmje do të regjistrojmë rreth 400 persona”, ka shkruar SEM në Twitter të shtunën

Gjithnjë e më shumë refugjatë nga Ukraina po kërkojnë mbrojtje në Zvicër. Sekretariati Shtetëror për Migracionin është i mbingarkuar me punë për shkak të numrit të madh të të ardhurve

Këshilli Federal ka aktivizuar të premten të ashtuquajturin status mbrojtjeje “S” për refugjatët nga Ukraina. Në këtë mënyrë, Zvicra synon t’u ofrojë refugjatëve mbrojtje të shpejtë dhe joburokratike, transmeton albinfo.ch.

Konkretisht, refugjatëve duhet t’u jepet shpejt e drejta e qëndrimit pa pasur nevojë të kalojnë procedurën e duhur të azilit.

Sekretariati Shtetëror për Migracionin (SEM) po raporton ndërkohë se “qindra” punonjës të tij po punojnë për të pranuar njerëzit nga Ukraina në qendrat federale të azilit.

“Fluksi është ende i madh, deri në mbrëmje do të regjistrojmë rreth 400 persona”, ka shkruar SEM në Twitter të shtunën.

Me statusin e mbrojtjes “S”, Këshilli Federal, përveç ukrainasve, u jep mbrojtje edhe njerëzve që kanë ikur nga vendet e treta, përcjell albinfo.ch. Kusht paraprak është që ata të kenë pasur leje qëndrimi të vlefshme përpara se të iknin në Ukrainë dhe nuk mund të kenë kthim të sigurt dhe të përhershëm në atdheun e tyre.

Aktualisht është e vështirë të vlerësohet se sa njerëz janë duke ardhur në të vërtetë në Zvicër. Ministrja në Qeverinë e Kantonit Glarus, njëherësh kryetare e drejtorëve kantonalë për çështje sociale, Marianne Lienhard, ishte e bindur të premten: “Unë mund vetëm të them se autoritetet janë duke e bërë mirë punën e tyre”.

---