Gjykata Supreme në SHBA shqyrton ndalimin e “terapisë së konvertimit” për të miturit LGBT+

Gjykata Supreme e Shteteve të Bashkuara, e cila dominohet nga anëtarë konservatorë, po merret me një çështje shumë të ndjeshme: ndalimin e terapisë së konvertimit për të miturit LGBT+.

Kjo terapi ka si qëllim “ndryshimin” e orientimit seksual apo identitetit gjinor të të rinjve, duke synuar që ata të heqin dorë nga të qenët homoseksualë apo transgjinorë. Kjo praktikë është ndaluar në rreth 20 shtete amerikane, përfshirë Koloradon, që e ka bërë këtë që prej vitit 2019.

Sipas autoriteteve të Kolorados, këto terapi jo vetëm që nuk janë efektive, por janë edhe të rrezikshme, duke rritur ndjeshëm rrezikun për ankth, depresion dhe vetëvrasje.

Por një psikologe, Kaley Chiles, e ka sfiduar ligjin në gjykatë, duke pretenduar se ai shkel Amendamentin e Parë të Kushtetutës, i cili garanton lirinë e shprehjes. Pas humbjes në dy gjykatat e mëparshme, ajo e ka çuar çështjen në Gjykatën Supreme.

Ky nuk është rasti i vetëm që ka të bëjë me të drejtat e personave LGBT+. Në muajt e ardhshëm, Gjykata do të shqyrtojë edhe pjesëmarrjen e personave transgjinorë në garat sportive për femra, një temë që u bë shumë e debatueshme gjatë fushatës presidenciale të Donald Trump në vitin 2024, ku ai u zotua të ndalte atë që e quajti “çmenduria transgjinore”.

Vendimet e pritshme të Gjykatës mund të kenë ndikim të madh në politikat që prekin komunitetin LGBT+ në SHBA.