Goditet një bandë në Austri, sekuestrohet drogë dhe armë

Raportohet se forcat e sigurisë në Austri kanë sekuestruar qindra armë, flamuj dhe pajisje naziste, gjatë bastisjeve në pronat e lidhura me një grup të ekstremit të djathtë, përcjell albinfo.at.

Thuhet se gjashtë persona u arrestuan gjatë operacionit, në të cilin u kontrolluan 13 prona në provincat e Austrisë së Epërme dhe të Poshtme.

Ndërkohë autoritetet besojnë se ata janë anëtarë të “bandave të jashtëligjshme të motoçikletave”.

Po ashtu, policia gjeti gjithashtu drogë ilegale dhe më shumë se 1 milion euro (860,000 £) para të gatshme, sipas BBC.

Operacioni u zhvillua të hënën, por detajet zyrtare rreth tij u publikuan të enjten.

Midis armëve të sekuestruara ishin “35 armë zjarri të gjata, 25 automatikë, 100 pistoleta, mbi një mijë komponentë armësh, 400 armë sinjalizuese”, sipas ministrisë së Brendshme.

Gjithashtu u gjetën granatahedhës dhe më shumë se 10,000 fishekë.

Kontrollet e shtëpive ishin pjesë e një hetimi më të madh për bandat kriminale të motoçikletave në Austri.

Zyrtarët e Ministrisë së Brendshme thanë se u bënë të vetëdijshëm në dhjetor 2022 se grupi i motoçikletave Bandidos, një organizatë ndërkombëtare, po planifikonte të zgjerohej në Austri.

Ministria tha se zhvillime të ngjashme në Zvicër kishin çuar në përleshje të dhunshme midis Bandidos dhe Engjëjve të Ferrit.

“Hetimet kanë treguar shkallën në të cilën ekstremizmi i krahut të djathtë përfaqësohet në bandat e motoçikletave të jashtëligjshme,” tha Omar Haijawi-Pirchner, kreu i agjencisë së inteligjencës së vendit (DSN).

Ai tha se konfiskimet e së hënës erdhën pasi Austria sheh “një militarizim në rritje të skenës së krahut të djathtë ekstrem”.

Policia tha se disa nga të arrestuarit në bastisje kishin lidhje të ngushta me shoqatën kriminale ekstremiste të krahut të djathtë të njohur si Objekti 21.

Austria ka legjislacion të rreptë anti-nazist, i cili ndalon aktivitetet që lavdërojnë Rajhun e Tretë dhe mbajtja e relikteve naziste ose neonaziste është e paligjshme.

Austria, e cila ishte vendlindja e Adolf Hitlerit, u aneksua në Gjermaninë naziste në vitin 1938 dhe ishte thellësisht e përfshirë në krimet e Rajhut të Tretë.

 

---