Grupmosha më e infektuar në Kosovë, nga 20 deri 29 vjeç

Kosova dje ka shënuar rekord të rasteve të infektimit me COVID-19, ku brenda 24 orëve janë konfirmuar 2 mijë e 110 raste. Nga rastet e reja, 1 mijë e 187 ishin femra, kurse 923 meshkuj.

Grupmosha më e prekur nga koronavirusi po vazhdon të jetë prej 20 deri 29 vjeç, gjithsej raste të konfirmuara 473. Pastaj, grupmosha 30 deri 39 vjeç, gjithsej raste të konfirmuara në 24 orët e fundit, 408.

Grupmosha 40 deri 49 vjeç, raste të konfirmuara 409. Pastaj, nga grupmosha 50 deri 59 vjeç, raste të konfirmuara 333.

Si pasojë e rritjes së rasteve me koronavirus, Qeveria e Kosovës ditën e mërkurë ka marrë vendim për ashpërsimin e masave kundër koronavirusit.

Me vendimin e ri të Qeverisë, nga data 20 gusht janë ndaluar dasmat dhe ahengjet e tjera familjare, kurse sektori i gastronomisë lejohet të punojë deri në orën 22:30.

Ekspertët shëndetësorë në vazhdimësi janë duke bërë thirrje që qytetarët të vaksinohen. Ndërkaq, prej fillimit të vaksinimit në të gjitha qytetet e Kosovës janë dhënë 622.068 doza të vaksinës.