Hapet “linja” energjetike Kosovë – Shqipëri

Marrëveshja për njohjen e Operatorit të Transmetimit të Kosovës është miratuar

Është bërë e ditur se marrëveshja për njohjen e Operatorit të Transmetimit të Kosovës është miratuar dhe se po konsiderohet si një hap i rëndësishëm për hyrjen në fuqi të marrëveshjeve të nënshkruara ndërmjet OST dhe KOSTT për rritjen e sigurisë së sistemit elektro-energjetik, vënien në punë të linjës së interkonjeksionit 400 KV Shqipëri-Kosovë, si edhe zhvillimin e tregut të përbashkët të energjisë elektrike mes dy vendeve, përcjell albinfo.ch.

Po ashtu, në njoftimim e Ministrisë së Infrastrukturës dhe Energjisë bëhet me dije se kjo marrëveshje ofron gjithashtu mundësinë e rritjes së shkëmbimeve tregtare dhe krijimin e lehtësive për tregtarët e energjisë elektrike për të kryer transaksione në kufirin Shqipëri- Kosovë, nxit iniciativat rajonale për bashkimin e tregjeve të energjisë, të cilat parashikohet të sjellin dhe një ulje të çmimeve të energjisë për konsumatorët, duke nxitur njëkohësisht edhe iniciativat e përdorimit të energjisë balancuese, në kuadër të Kodit Evropian të balancimit.

Duhet theksuar se aprovimi i marrëveshjes i hap rrugë hyrjes në fuqi të marrëveshjes mes OST dhe KOSTT sa i takon uljes së humbjeve teknike në sistemet e transmetimit respektive.

Marrëveshja në fjalë do të bëjë të mundur edhe shtimin e kapaciteteve transmetuese të OST, ku nëpërmjet investimit të ri të planifikuar të linjës 400kV Shqipëri-Maqedoni e Veriut, OST do të jetë e ndërlidhur me të gjithë Operatorët e Transmetimit të vendeve fqinje nëpërmjet rrjetit 400kV, i cili ofron një besueshmëri të lartë në operimin e sistemit elektroenergjetik”, thuhet në njoftimin e ministrisë. /Albinfo.ch

 

---