Haradinaj dhe Thaçi ‘përplasen’ për kufirin mes Kosovës e Serbisë

Kryeministri dhe presidenti i Kosovës me ide të ndryshime për dialogun me Serbinë

Kryeministri i Kosovës, Ramush Haradinaj përmes një reagimi u shpreh kundër ridizajnimit të kufijve në mes të Kosovës dhe Serbisë, duke shtuar se ridizajnimi i kufijve dhe shkëmbimi i territoreve është ftesë për tragjedi të re në Ballkan.

“Si kryeministër i Republikës së Kosovës do të vazhdoj fuqishëm të qëndroj kundër këtyre ideve shkatërruese dhe u bëj thirrje të gjitha vendeve mike dhe institucioneve ndërkombëtare kontribuese për Kosovën, që të kundërshtojnë idetë shkatërruese dhe të mos lejojnë që ato të arrijnë në tryezën e vendimmarrjes”, thuhej në një pjesë të reagimit të Haradinajt, përcjell albinfo.ch.

Ndaj kësaj nuk vonoi të përgjigjet Presidenti Hashim Thaçi, i cili ka thënë se “thirrjet për luftë dhe tragjedi të reja në Ballkan i takojnë mentalitetit të shekullit të kaluar dhe si të tilla, meritojnë vetëm të hidhen në shportë”.

“Të gjitha shtetet perëndimore, aleatët tanë, garantuesit e paqes dhe sigurisë në Ballkan po bëjnë përpjekje dhe thirrje për paqe, stabilitet dhe arritje të marrëveshjes përfundimtare ndërmjet Kosovës dhe Serbisë. Kjo marrëveshje nënkupton njohje reciproke dhe perspektivë të sigurt të anëtarësimit të Kosovës në BE, NATO dhe OKB. Por, fatkeqësisht, individë të caktuar në vendin tonë, me veprimet e tyre po tentojnë të krijojnë panik dhe konfuzion. Kosova, përkundër kësaj, mbetet e përkushtuar për dialog dhe arritje të marrëveshjes paqësore përfundimtare”, ka reaguar Thaçi.

---