Haradinaj: Kosova, pjesë e rëndësishme e procesit të Berlinit

Kryeministri i Kosovës, Ramush Haradinaj, ka thënë se Kryeministri i Bullgarisë, Boyko Borissov, ka një qëndrimin parimor ndaj Kosovës dhe të drejtës së saj për të qenë pjesë e familjes evropiane.

“Vendimi, që samiti i ardhshëm të ketë nikoqir Bullgarinë dhe Maqedoninë e Veriut e bënë edhe më domethënës procesin e Berlinit për Ballkanin Perëndimor”, ka thënë Haradinaj.

Ai përmes një postimi në rrjetin social Facebook ka thënë se Kosova është pjesë e rëndësishme e procesit të Berlinit.

“Kosova është pjesë e rëndësishme e këtij procesi dhe rreshtohet krah aleatëve si vlerë e shtuar e integrimit të rajonit në BE. Njohja reciproke me Serbinë në kufijtë ekzistues, do të hapte perspektivën tonë. E përkrah fuqishëm vizionin e Kryeministrit Borissov për një Evropë gjithëpërfshirëse, që shkon përtej mendësive të shekullit të kaluar, mendësi që kanë krijuar tragjedi dhe përjashtime. Pa përfshirjen e të gjitha shteteve të Ballkanit Perëndimor, si pjesë përbërëse të familjes evropiane, BE nuk do të jetë e plotë. Faleminderit Boyko!”, ka shkruar ai.