Haxhaj: Presion nga Thaçi për Dardafon.net

Burime nga Prokuroria Speciale e Kosovës i kanë thënë se Haxha e ka arsyetuar nënshkrimin e kontratës me presionin e bërë ndaj tij

Drejtori ekzekutiv i PTK-së, Shyqyri Haxha, u ka thënë hetuesve të EULEX-it se është detyruar nga kryeministri Hashim Thaçi që ta nënshkruajë kontratën me “Dardafon.net”.

Gjatë intervistës, në fillim të hetimeve, Haxha ka thënë se nënshkrimin e kontratës, e cila nga prokuroria është vlerësuar e dëmshme për PTK-në dhe për çka Haxha edhe është akuzuar, e ka bërë si rezultat i presionit nga kryeministri. Burime të Kohës Ditore nga Prokuroria Speciale e Kosovës i kanë thënë gazetës se Haxha e ka arsyetuar nënshkrimin e kontratës me presionin e bërë ndaj tij.

Ai u ka thënë hetuesve se pak kohë para nënshkrimit të kontratës kishte marrë një telefonatë nga Thaçi, i cili i kishte këshilluar që ta nënshkruante. Më vonë, kur është intervistuar nga prokurori si i dyshuar, Haxha ka mohuar deklarimin e mëparshëm, duke thënë se nuk ka pasur presion nga Thaçi.