Hilmi Gashi zgjidhet kryetar i asamblesë së komunës Muri-Gümligen

Hilmi Gashi, asamblist prej tashmë dy mandatesh, tani është zgjedhur kryetar i parlamentit në komunën Muri-Gümligen të Bernës

Në votimin që është mbajtur mbrëmë, më 21 janar, Hilmi Gashi, asamblist prej tashmë dy mandatesh është zgjedhur kryetar i asamblesë (parlamentit) në komunën Muri-Gümligen të Kantonit të Bernës.

Krahas punës në asamble, Gashi është i njohur si aktivist shumëvjeçar i komunitetit shqiptar të Zvicrës.

Ai është lindur në vitin 1967 në fshatin Atmaxhë të Prizrenit ndërsa në Zvicër ka ardhur para më shumë se 30 vitesh, ku jeton në Muri-Gümligen.

Ai është angazhuar prej shumë vitesh në Partinë e Gjelbër dhe në sindikatën Unia, shkruan albinfo.ch. Në këtë të fundit, që është sindikata më e madhe e Zvicrës, Hilmi Gashi mban pozitën e lartë të përgjegjësit për migracion, në nivelin federal.

Gashi njihet për qëndrimin dhe angazhimin e tij konsekuent për realizimin e barazisë shoqërore në mesin ku jeton dhe për këtë ka fituar besimin për tu zgjedhur në instanca të ndryshme politike e shoqërore, në nivel lokal, regjional e nacional, të Zvicrës.

---