“Hipermarketi patriotik” serbo-shqiptar lë pa koment Beogradin

Një orë para se realiteti shqiptaro-serb të ballafaqohej artistikisht në skenën e teatrit “Bitef”, objekti ishte nën masa sigurie.

Afro dhjetë policë të shpërndarë rreth ndërtesës, që dikur ka qenë kishë, jepnin pamjen e një situate të jashtëzakonshme. Por, krejt çka do të ndodhte të hënën në mbrëmje në atë teatër ka qenë një shfaqje.

“Është lajmëruar se mund të ketë probleme që mund të shkaktohen nga huliganë a nacionalistë”, ka qenë përgjigjja që organizatorët kanë dhënë kur janë pyetur për arsyen e pranisë së policisë, shkruan Koha Ditore.

Të hënën në teatrin “Bitef” është dhënë premiera e shfaqjes me regji të Dino Mustafiq, “Hipermarketi patriotik”, ku luajnë aktorët nga Kosova, Serbia, Maqedonia dhe Shqipëria.

Teksti i shfaqjes i shkruar nga dramaturgu kosovar Jeton Neziraj dhe kolegia e tij nga Serbia, Minja Bogavac, i bazuar në rrëfimet e vërteta të njerëzve të thjeshtë nga këto vende, është vënë në skenë nga aktorët Kushtrim Hoxha, Ema Andrea, Slobodan Beshtiq, Dubravka Kovjaniq, Bajrush Mjaku dhe Milutin Milosheviq.