IKD-ja kërkon proces të Vettingut në sistemin e drejtësisë

Instituti i Kosovës për Drejtësi ka kërkuar edhe një herë nisjen e procesit të Vettingut në sistemin e drejtësisë dhe shkarkimin e Kryeprokurorit të shtetit, Aleksandër Lumezi.

“IKD-ja insiston që sistemi i drejtësisë të përfshihet në një Vetting të thellë, duke filluar prej Policisë, Prokurorisë dhe Gjyqësorit. Këtij procesi duhet t’i paraprijnë ndryshimet kushtetuese dhe më pas Ligji i Vettingut, për të cilat nevojitet vullnet politik në Kuvendin e Kosovës. Sidoqoftë, tash për tash është e domosdoshme që sistemi prokurorial të këndellet në hapat e tij, duke shkarkuar fillimisht Kryeprokurorin e politizuar, Aleksandër Lumezi, për të kaluar më pas në një tranzicion, i cili do të përgatiste procesin e Vettingut”, thuhet në komunikatën e këtij Instituti, përcjell albinfo.ch.

Aty thuhet se rasti i dorëheqjes së prokurorit special, Elez Blakaj dhe letra e tij publike, dëshmojnë mungesën e sigurisë  juridike dhe fizike për prokurorët dhe gjykatësit, si dhe dukurinë e përballjes me presione, shantazhe dhe kërcënime të ndryshme në kryerjen e detyrave në mënyrë të pavarur, të paanshme dhe profesionale.

Sipas IKD-së, reagimet publike, pas dorëheqjes së Blakajt, nga Kryeprokurori Lumezi, Këshilli Prokurorial i Kosovës, Shoqata e Prokurorëve, kryeministri Haradinaj, kryeparlamentari  Veseli dhe presidenti Thaçi dhe deputetë e qeveritarë të tjerë, dëshmuan kërcënimet që kishte pasur ai në kryerjen e hetimeve.