Incident në Rusi, tifozët e Zenitit sulmojnë Mirlind Dakun

Gjatë ndeshjes së Kupës së Rusisë më 12 gusht në Shën Petersburg, ka ndodhur një episod i shëmtuar ndaj sulmuesit shqiptar Mirlind Daku. Futbollisti i Rubin Kazanit u bë objekt i thirrjeve fyese dhe ofendimeve nga tifozët e Zenitit, gjë që ka detyruar Federatën Ruse të Futbollit të nisë një hetim. Kreu i Komitetit të Disiplinës, Artur Grigoryants, deklaroi për agjencinë “RIA Novosti” se çështja do të shqyrtohet në mbledhjen e 20 gushtit.

Në fushë, Zeniti arriti një fitore bindëse 3-0, ndërsa goli i Dakut u anulua pas rishikimit të VAR-it. Kujtojmë se gjatë verës klubi nga Shën Petersburgu kishte shfaqur interes për ta transferuar sulmuesin shqiptar, por marrëveshja dështoi dhe Rubin vendosi t’i zgjasë kontratën 27-vjeçarit.

Ndërkohë, në Itali emri i Dakut lidhet gjithnjë e më shumë me Fiorentinën. Mediat sportive raportojnë se klubi “viola” po e ndjek me interes. Në takimin e fundit, megjithatë, Daku nuk shkëlqeu si zakonisht: realizoi vetëm dy gjuajtje, u kap një herë në pozicion jashtë loje dhe fitoi katër nga 14 duele. Trajneri kundërshtar pranoi pas ndeshjes se kishte udhëzuar mbrojtësit të fokusoheshin posaçërisht në neutralizimin e tij.