“Incident serioz” në aeroportin e Prishtinës, aeroplanit për Gjenevë i del vetura në pistë

Ngjarja ka ndodhur në qershor të këtij viti

Bordi Zviceran për Hetimin e Sigurisë së Transportit (STSB) të premten ka njoftuar për një incident, të cilin e ka cilësuar si serioz, që ka ndodhur në aeroportin e Prishtinës më 20 qershor.

Një aeroplani të kompanisë “Easyjet”, A320, i ishte konfirmuar se mund të nisej nga njëra prej pistave në Prishtinë, por më pas ka vërejtur se në të njëjtën pistë ka qenë një veturë e aeroportit “Adem Jashari”.

Aeroplani ka arritur ta shmangë një incident të madh duke fluturuar mbi veturën derisa ende i kishte rrotat e lëshuara.

Bordi ka thënë se Komisioni për Hetimin e Aksidenteve dhe Incidenteve Aeronautike në Zyrën e Kryeministrit të Kosovës ka nisur hetim për rastin.

Aeroplani ishte nisur për në Gjenevë.

“Aeroplani A320 ishte liruar për ngritje nga pista 35. Në një njëjtën kohë, një veturë që i përkiste aeroportit po qëndronte në pistë afër portës 17 në skajin lindor të pistës. Pas ngritjes, aeroplani ka fluturuar mbi veturë me një lartësi të mjaftueshme. Ekipi i aeroplanit ka deklaruar se kishin fluturuar mbi veturë me rrotat e uljes ende të zgjatura”, thuhet në raportin e Bordit.

 

---