Industria automobilistike gjermane shkurton mbi 51 mijë vende pune

(KEYSTONE/DPA/Julian Stratenschulte)

Industria e automobilave në Gjermani po përballet me një krizë të thellë, duke humbur rreth 51.500 vende pune brenda një viti, që përbën gati 7% të fuqisë punëtore të sektorit. Sipas një studimi të kompanisë së kontabilitetit EY, kjo rënie përbën pothuajse gjysmën e 114 mijë vendeve të punës industriale të eliminuara në të njëjtën periudhë, shkruan DW, transmeton albinfo.ch.

Të dhënat tregojnë se fenomeni po përshpejtohet: që nga viti 2019, para pandemisë COVID-19, janë zhdukur 112 mijë vende pune në industrinë automobilistike gjermane, gjysma e të cilave vetëm në 12 muajt e fundit.

Arsyet kryesore lidhen me rënie të eksporteve drejt Shteteve të Bashkuara dhe Kinës, dy tregjet më fitimprurëse për Gjermaninë. Në tremujorin e dytë të vitit 2025, eksportet drejt SHBA-së ranë me 10%, ndërsa ato drejt Kinës pësuan një rënie më të thellë prej 14%, duke e zbritur Kinën në vendin e gjashtë të destinacioneve kryesore.

Përkeqësimi i situatës lidhet edhe me tarifat e reja doganore, përfshirë ato të vendosura nga presidenti amerikan Donald Trump për automjetet, të cilat kanë arritur deri në 15%. Nga ana tjetër, BE-ja dhe Kina janë përfshirë në një betejë tregtare mbi automjetet elektrike, çka ka vështirësuar edhe më tej pozitën e prodhuesve gjermanë.

Kompani të mëdha si Mercedes-Benz, Volkswagen, Audi, Bosch, Continental, ZF dhe Porsche kanë nisur programe të gjera kursimi dhe ristrukturimi, duke u përqendruar kryesisht në Gjermani.

“Rënia masive e fitimeve dhe dobësimi i tregjeve të eksportit i bëjnë të pashmangshme shkurtimet e vendeve të punës,” tha Jan Brohriker nga EY, duke paralajmëruar se situata do të ndikojë edhe tek të rinjtë e diplomuar në inxhinieri dhe teknologji, transmeton albinfo.ch.