Inteligjenca Artificiale po ndihmon në mjekësi

Detaje të pamundura për t’u njohur për syrin e njeriut, por jo për IA

Teknika e inteligjencës artificiale që qëndron në themel të njohjes së fytyrës është përdorur për të ndihmuar në njohjen e tumoreve dhe viruseve duke zbuluar shenjat e tyre në bërthamën e qelizave.

Kjo teknikë quhet AINU, një model i ri i inteligjencës artificiale i zhvilluar nga grupi kërkimor ndërkombëtar i udhëhequr nga Davide Carnevali i Qendrës për Rregullimin Gjenomik të Barcelonës.

Rezultati është publikuar në revistën “Nature Machine Intelligence” dhe do të jetë në gjendje të ndihmojë në diagnostikimin e sëmundjeve dhe infeksioneve shumë shpejt, por kërkon përdorimin e mikroskopëve shumë të fuqishëm, shkruan ATSH, transmeton albinfo.ch.

Analiza e imazheve me IA ka bërë përparim të jashtëzakonshëm vitet e fundit dhe të njëjtat teknika të përdorura për njohjen e fytyrës ose makinat vetëdrejtuese tani mund të ndihmojnë në njohjen e hershme të disa patologjive.

Instrumenti AINU, akronimi i ”Nucleus AI”, skanon imazhe me rezolucion të lartë të bërthamës së qelizës të marra me një teknikë inovative mikroskopike të quajtur Storm.

Foto me detaje prej vetëm 20 nanometrash, pra 5 000 herë më të vogla se trashësia e një fijeje floku, na lejojnë të njohim anomalitë në strukturën tredimensionale të ADN-së, edhe disa orë pas hyrjes së një virusi.

Detaje të pamundura për t’u njohur për syrin e njeriut, por jo për IA.

“Sot, për të kryer diagnoza të këtij lloji është e nevojshme të presim për manifestime qartësisht të dukshme të patologjisë, por ne mendojmë se, një ditë, ky lloj informacioni mund t’u kursejë mjekëve kohë të çmuar për të monitoruar sëmundjet, për të personalizuar trajtimet dhe për të përmirësuar rezultatet për pacientët”, tha Pia Cosma, bashkautore e studimit.

”Një nga kufizimet e teknikës së re”, theksojnë vetë studiuesit, ”është disponueshmëria në spitale e mikroskopëve të sofistikuar si Storm, e cila ka kosto të lartë. Për më tepër, sistemi lejon që vetëm disa qeliza të analizohen në të njëjtën kohë.

“Transformimet që do të kërkojnë kohë”, shpjegojnë autorët, ”por teknika në vend të kësaj mund të përdoret lehtësisht nga qendrat kërkimore që punojnë me qelizat staminale, pasi metoda tashmë i lejon ato të njihen në inde shumë lehtë dhe shpejt”.

---