Interesim i madh për ngjarjen e CH-APEN & albinfo.ch: Shqiptarët e Zvicrës mes tre brezave

Një mbrëmje që vërtetoi se komuniteti shqiptar në Zvicër po e shkruan historinë e tij me dinjitet, punë dhe krenari ndër breza

Mbrëmjen e të shtunës së javës që shkoi patëm nderin të organizojmë dhe të udhëheqim eventin speak@oda me temën “Shqiptarët e Zvicrës mes tre brezave” në Restorant Letzigrund, në Zurich. Interesimi ishte aq i madh, saqë u desh të improvizonim vende shtesë për mysafirët, gjë që tregoi se komuniteti ynë ka etje për t’u bashkuar dhe për të ndarë histori nga e kaluara e tyre emocionale.

Në qendër të mbrëmjes qëndruan shoqatat profesionale shqiptare, të cilat përfaqësojnë shtyllat më solide të diasporës sonë.

Kryetari i Lidhjes së Mjekëve Shqiptarë të Zvicrës (LMSHZ), Dr. med. Mentor Bilali, prezantoi me qartësi dhe profesionalizëm punën dhe rrugëtimin e Lidhjes së Mjekëve Shqiptarë në Zvicër.

Ai solli disa ilustrime interesante nga e kaluara e tij personale si njëri ndër mjekët e parë shqiptarë që kishin trajtuar mediat zvicerane, me titullin “shqiptarët e mirë”.

AES – Albanian Engineering of Switzerland, u prezantua me dy nënkryetarët, Enver Halilajn dhe Kushtrim Ajvazin, të cilët sollën kontributin e mbi 100 inxhinierëve shqiptarë në Zvicër.

Në fund, Orhan Spahiu, kryetar i Kuvendit të Shqiptarëve të Zvicrës, dha një panoramë të plotë të përfaqësimit dhe integrimit të komunitetit tonë në Zvicër.

Ajo që e shënoi vërtet mbrëmjen ishte dokumentari “Shqiptarët mes 3 brezave në Zvicër”. Dokumentari ishte mbresëlënës, i thellë dhe i sinqertë. Ai ngjalli emocione të forta tek të gjithë, aq sa shumë prej nesh pamë burra e gra të brezit të dytë që fshinin lotët, sepse secili gjeti një pjesë të vetes në historinë e rrëfimit të Nue Munishit, plakut të urtë nga rajoni i Gjilanit, i cili me fjalë të thjeshta, melankolike dhe plot peshë rrëfeu sakrificat, mungesat dhe shpresën e emigrimit të viteve ’70-ta.

Ai foli me një dhimbje e me një krenari të heshtur, me atë lloj zëri që të depërton në shpirt dhe emocione që nuk fshihen dot. Ky moment e bëri të qartë se historia e mërgatës është histori zemre.

Chapen po ashtu prezantoi përmes profesorit Taulant Qerkini ndryshimin e logos Chapen dhe logon e re të Business Franga Club. BFC synon përmes anëtarëve e afaristëve të njohur shqiptarë, të shtrojë rrugë të reja për start-up të rinj që janë kreativ me idetë e tyre për zhvillimin e bizneseve.

Logoja e re dhe logoja BFC janë një bashkim i elementet kombëtare zvicerane dhe shqiptare. Emri Business Franga Club ka motivin te monedha e parë shqiptare, që ishte frangu shqiptar.

Ekspozita artistike solli një dimension kulturor të bukur: pikturat “Lunarise” të artistes Olsjana Ajdini, veprat e profesorit Eshref Qahili, si dhe orët shqiptare Oradora Watches me simbolet e Skënderbeut dhe Adem Jasharit, u pritën me shumë interes.

Mbrëmja u mbyll me inaugurimin e Business Franga Club dhe me darkën e përbashkët. Atmosfera ishte aq pozitive, sa që edhe pas përfundimit zyrtar, mysafirët mbetën gjatë duke biseduar e kënduar bashkë me talenten e re, Trina Haliti. Faleminderit të gjithëve që ishin pjesë e kësaj nate të veçantë. Kjo mbrëmje vërtetoi se komuniteti shqiptar në Zvicër po e shkruan historinë e tij me dinjitet, punë dhe krenari ndër breza.

Fotot: Rromir Imami (albinfo.ch)

---