Ish-presidenti amerikan thotë se do ta arrestojnë

Keystone EPA/MICHAEL REYNOLDS

Në rrjetet sociale të shtunën, ish-presidenti amerikan, Donald Trump, ka thënë se pret të arrestohet të martën. Ai ka shtuar se kjo mund të vie për shkak të një rasti të trajtuar nga Zyra e Prokurorit të Qarkut të Manhatanit, shkruan Radio Evropa e Lirë, përcjell albinfo.ch.

Madje Trump ka bërë thirrje edhe për protesta. “Kandidati favorit i republikanëve dhe ish-presidenti i Shteteve të Bashkuara do të arrestohet të martën e javës së ardhshme. Protestoni, rikthejeni kombin tonë sërish”.

Mediat amerikane shkruajnë se hetimet kanë për bazë një pagesë prej 130.000 dollarëve, e kryer disa javë para zgjedhjeve presidenciale të vitit 2016, për të ndaluar Stormy Daniels, emri real i së cilës është Stephanie Clifford, që të tregojë publikisht për një aferë, që ka thënë se e ka pasur me Trumpin, vite më parë, raporton Radio Evropa e Lirë, përcjell albinfo.ch.

Prokurorët janë duke analizuar nëse do të ngrenë akuzë kundër Trump për këtë rast. Nëse prokurori e padit Trumpin, atëherë 76-vjeçari do të bëhet ish-presidenti i parë amerikan që akuzohet për vepër penale. Një avokat i Trumpit ka thënë për rrjetin CNBC të premten se klienti i tij do të dorëzohet për t’u përballur me akuzat, shkruan Radio Evropa e Lirë, përcjell albinfo.ch.

Ish-presidenti amerikan, Donald Trump, ka mohuar vazhdimisht se ka pasur aferë me Daniels.