Ish-presidentja e Zvicrës: Do ta kisha shumë të vështirë ta qeverisja Kosovën sot

albinfo.ch

Në një intervistë për mediat zvicerane, Micheline Calmy-Rey, ish-presidente e Zvicrës, tha se po të ishte kryeministre e Kosovës sot, do ta kishte shumë të vështirë të qeveriste, transmeton albinfo.ch.

Ajo për swissinfo.ch tha se tensioni me Serbinë mbetet “pengesa kryesore” drejt njohjeve të reja.

“Po të isha kryeministre e Kosovës sot, do ta kisha shumë të vështirë ta qeverisja këtë vend”, tha Calmy-Rey.

“Në veri të Kosovës, ku popullsia është kryesisht serbe, ekziston një sistem social paralel. Tekstet shkollore ofrohen nga Serbia. Disa komuna refuzojnë të pranojnë autoritetin e Prishtinës. Është një vend i vështirë për t’u qeverisur. Bashkimi Europian ndërmjetëson mes Serbisë dhe Kosovës, por udhëheqësit e tij – përfaqësuesi special i BE-së, Miroslav Lajčák dhe shefi i politikës së jashtme, Josep Borrell, për shembull – vijnë nga vende që nuk e njohin pavarësinë e Kosovës”, theksoi ish-presidentja helvetike.

Kujtojmë se para një viti ish-presidentja zvicerane, Micheline Calmy-Rey, u nderua në Kosovë. Presidentja Vjosa Osmani ia kishte dorëzuar asaj medaljen “Urdhri i Pavarësisë”.