Iu bashkua ISIS-it, kosovari dënohet me 3 vjet burg

Gjykata thotë se ka gjetur prova të mjaftueshme se ky qytetarë F.B, ka luftuar përkrah terroristëve në ISIS, vepër kjo e dënuar me ligjet e Kosovës

Gjykata Themelore në Gjilan ka dënuar me tre vjet burg të pandehurin F.B, pasi është vërtetuar se ai ka qenë pjesë e organizatës terroriste ISIS në Siri e Irak. Në shpallje të aktgjykimit është thënë se i akuzuari,  shtetas i Republikës së Kosovës, është shpallur fajtor, sepse me datë 17 Shkurt 2015, iu ka bashkangjitur organizatës terroriste ISIS, e cila organizatë është shpallur terroriste nga Kombet e Bashkuara.

Duke iu bashkuar kësaj organizate, i akuzuari ka kryer trajnimin teorik dhe praktik për përdorimin e armës së zjarrit AK-47 dhe bombës së dorës, transmeton zeri. Me këtë i akuzuari F. B. ka kryer veprën penale: organizimi dhe pjesëmarrja në grup terrorist që është e dënueshme me ligjet e Kosovës.

Trupi gjykues ka dënuar me tre vite burgim, të cilin dënim i akuzuari do të vuaj pas plotfuqishmërisë së këtij aktgjykimi, ndërsa nga sot masa e paraburgimit i ndërpritet të akuzuarit, është thënë në aktgjykim.

Siç kanë deklaruar zyrtarët e institucioneve të Kosovës, që nga fillimi i luftës qytetare në Siri e Irak, rreth 300 kosovarë i janë bashkuar grupeve ekstremiste dhe terroriste në Lindjen e Mesme. Policia e Kosovës me herët ka deklaruar se rreth 120 prej tyre janë kthyer, ndaj të cilëve po zhvillohet proces gjyqësor. Më shumë se 40 janë deklaruar të vrarë.