Izolimi i shtrenjtë: për 6 vjet u paguan 30 milionë € për viza

Sipas disa statistikave që kanë publikuar mediet kosovare, vetëm për 6 vjet, kosovarët kanë shpenzuar rreth 30 milionë euro për pagesën e vizave nëpër ambasada

Qytetarët e Kosovës kanë shpenzuar dhjetëra miliona euro nëpër ambasadat e shteteve evropiane vetëm për pagesën e aplikimit për vizë Schengen. Sipas disa statistikave që kanë publikuar mediet kosovare, vetëm për 6 vjet, kosovarët kanë shpenzuar rreth 30 milionë euro për viza.

Këtu nuk përfshihen dhe përgatitjet e dokumenteve (që kanë qenë ndoshta edhe më të shtrenjta) por vetëm pagesa për viza.

Edhe tani kur është dhënë rekomandimi për liberalizim vizash nga Komisioni Evropian, qindra qytetarë presin para ambasadave për t’u pajisur me viza, ose për të bërë termin për aplikim vize. Siç raporton “Zëri” vetëm në ambasadën gjermane në Prishtinë presin rreth 30 studentë për viza dhe rreth 50 të tjerë për bashkim familjar.

Instituti “GAP” dhe Instituti për Studime Juridike dhe Politike, përmes një hulumtimi ka konstatuar se Kosova është vendi më i varfër dhe me shkallën më të lartë të papunësisë në Evropë, por përkundër kësaj, kosovarët shpenzojnë më së shumti në Evropë për të aplikuar për viza.

Për tri vite, 217.862 kosovarë ka-në aplikuar për vizë “Schengen”: 82.405 në vitin 2010, 67.901 në vitin 2011 dhe 67.556 në vitin 2012. e nëse ka vazhduar ky trend edhe për tri vitet tjera, del se përmbi 400 mijë kosovarë kanë aplikuar për viza për gjashtë vjet. Mbi 17 për qind e aplikantëve për viza refuzohen nga shtetet e zonës “Schengen”.

Kërkesat më të mëdha për viza janë bërë në ambasadën e Gjermanisë dhe të Zvicrës.