Jakup Krasniqi përlotet derisa flet para Speciales: Nuk jam as mysliman e as katolik, jam shqiptar

Ish-zëdhënësi i Ushtrisë Çlirimtare të Kosovës, Jakup Krasniqi ka thënë se ka menduar të mos marrë avokat mbrojtës dhe të vetëmbrohet në Gjykatën e Hagës.

Në seancën e sotme para prokurorit të Specializuar, Krasniqi tha se nuk ka menduar të marrë avokat mbrojtës, por ishte dëshira e familjes së tij dhe shokve që ta ketë atë.

“Nuk kam menduar të marrë avokat mbrojtës, ishte dëshira e familjes dhe e shokëve që të kem avokat dhe e pranova, përndryshe e kam një bindje që nuk më duhet avokati. Nuk mbaj asnjë përgjegjësi të vetme me këtë që akuzohem, as të veprimit e as të mosveprimit, detyra ime ka qenë publike, kryesorja ka qenë zëdhënës i Ushtrisë Çlirimtare të Kosovës, që më ka flejtur më së shumti në shpirt. Unë gjithçka që kam bërë ka qenë publike, jo vetëm në gjuhën shqipe, por edhe në gjuhën angleze, gjermane, frënge e italiane. I kam dhënë zë luftës së UÇK-së, nëpër rrethana të vështira. Veprat për të cilat pretendon aktakuza, asnjëra nuk qëndron, unë në muajt në vazhdim do të ofrojë fakte konkrete. Jam tepër i mllefosur sepse këtu gjindem pa të drejtë, unë duhet të jem në vendin tim, në familjen time”, ka thënë Krasniqi.

Ish-kryeparlamentari dhe ish-zëdhënësi i Ushtrisë Çlirimtare të Kosovës (UÇK), Jakup Krasniqi është emocionuar teksa ka folur në paraqitjen e parë para Gjykatës Speciale. Ai ka pasur kritika të ashpra për këtë gjykatë, derisa në jo pak momente emocionuese gjatë deklarimit të tij, atij i është dridhur zëri, duke shtuar se me rëndësi që është shqiptar dhe jo mysliman apo katolik.

“Unë dhe populli im kemi mbajtë shumë padrejtësi dhe nuk kemi pasë nevojë për një tjetër padrejtësi”, tha Krasniqi, duke e ndërprerë fjalinë në gjysmë pas emocioneve.

“S’do të ndihesha mirë të isha në shërbim të politikave të krimit dhe gjenocidit të Serbisë”, theksoi Krasniqi.

I emocionuar, ai foli për përpjekjen e UÇK-së për çlirimin e Kosovës. Ai tha se Gjykata Speciale është adresa e akuza ndaj tij.