Januzaj kërkon të largohet

Adnan Januzaj po ndiqet me interes nga Sunderland, Everton, Milan, PSG dhe Ajax

Adnan Januzaj u ka kërkuar drejtuesve të Manchester United që ta shesin kartonin e tij. Futbollisti 21 vjeçar ishte një prej lojtarëve që Jose Mourinho takoi të enjten dhe u tha që të kërkonin një skuadër ku të huazoheshin në mënyrë që të luanin më rregullisht, shkruan albinfo.ch.

Por futbollisti, padyshim i këshilluar nga menaxheri i tij, ka vendosur që të shkëputet përfundimisht nga Manchester United, i ndërgjegjshëm se nën drejtimin e Mourinhos, vështirë se do të gjejë ndonjë herë hapësira te “Djajtë e Kuq”.

Sipas “Daily Mail”, ai as që do të marrë mundimin të provojë vlerat e tij para trajnerit portugez, por ka kërkuar që ta shesin përfundimisht kartonin e tij. Në bazë të informacionit të së përditshmes britanike, Januzaj po ndiqet me interes nga Sunderland, Everton, Milan, PSG dhe Ajax.

“Djajtë e Kuq” duket se i kanë kthyer një përgjigje pozitive, thjesht presin ofertat për futbollistin i cili kishte një të ardhme shumë premtuese por që deri tani është përshkruar kudo që ka shkuar si një personazh problematik.