Javën e ardhshme nis procesi gjyqësor në rastin “Konflikti i Kumanovës”

Në konfliktin e Kumanovës humbën jetën tetë policë dhe dhjetë pjesëtarë të grupit të armatosur, ndërsa mbetën të plagosur dhjetëra të tjerë

albinfo.ch

Prokuroria shtetërore e Maqedonisë ka njoftuar se të martën e javës së ardhshme do ta fillojë procesi gjyqësor kundër të arrestuarve shqiptarë në rastin e ashtuquajtur “Konflikti i Kumanovës”. Televizioni Alsat ka raportuar se prokuroria do të fillojë t’i marrë deklaratat nga të arrestuarit dhe me këtë edhe formalisht do të fillojë procesi gjyqësor.

“Marrja e deklaratave nga ana e prokurores do të fillojë të martën, te të arrestuarit në burgun e Shutkës, kurse më pas do të vazhdojë edhe në burgun e Prilepit dhe Manastirit. Më pas do të përpilohet aktakuza përfundimtare e Prokurorisë, e cila do të na dorëzohet neve, që të mund të përgatisim mbrojtjen”, citon Alsat avokatin Naser Raufi.

Në konfliktin e Kumanovës humbën jetën tetë policë dhe dhjetë pjesëtarë të grupit të armatosur, ndërsa mbetën të plagosur dhjetëra të tjerë. 30 prej grupit të armatosur u dorëzuan, ndërsa Ministria e Punëve të Brendshme e Maqedonisë në deklaratën e 9 majit patri thënë se “grupi i organizuar kishte qëllim sulme terroriste ndaj institucioneve të Maqedonisë”.