Joe Biden shpall kandidaturën për president të SHBA-së

Ish-nënpresidenti amerikan, Joe Biden, zyrtarisht shpalli kandidaturën e tij për nominimin e Partisë Demokratike si kandidat për zgjedhjet presidenciale të vitit 2020 në SHBA.

“Ne jemi në këtë betejë për shpirtin e këtij kombi”, tha Biden përmes një video-mesazhi, duke iu bërë thirrje votuesve të refuzojnë edhe një mandat në Shtëpinë e Bardhë për presidentin Donald Trump.

“Nëse i japim Donald Trumpit tetë vjet në Shtëpinë e Bardhë, ai përgjithmonë dhe thelbësisht do të ndryshojë karakterin e këtij kombi”, tha Biden.

Biden u bashkohet dhjetëra demokratëve që kanë shpallur kandidaturën për president për zgjedhjet e vitit 2020.

Deri më tani, në shumë sondazhe brenda demokratëve, udhëheq senatori Bernie Sanders.

Nëse do të fitonte zgjedhjet, Biden do të ishte personi më i vjetër i zgjedhur ndonjëherë president i SHBA-së.

Ish-nënpresidenti 76-vjeçar, Joe Biden, është njëri ndër personalitetet më të njohura në politikën e SHBA-së. Midis demokratëve ai vlerësohet për përvojën e tij në fushën legjislative dhe të politikës së jashtme.

Ai ka qenë për gjashtë mandate senator, shërbeu si zëvendës i Presidentit Barak Obama për dy mandate dhe u kandidua dy herë për president, në vitin 1988 dhe 2008, mirëpo nuk pati sukses, shkruan rel, përcjell albinfo.ch.

Ai planifikoi kandidimin përsëri në vitin 2016, por u tërhoq pas vdekjes së djalit të tij 46-vjeçar, Beau Biden.

Djali i tij, Beau, ka shërbyer edhe në Kosovë në kuadër të forcave paqeruajtëse amerikane në kampin “Bondsteel”.

Gjatë një vizite në Kosovë, në vitin 2016, Joe Biden mori pjesë në ceremoninë që u organizua kushtuar djalit të tij të ndjerë. Një rrugë në afërsi të kampit ushtarak amerikan “Bondsteel”, në magjistralen Ferizaj-Gjilan, u emërtua “Beau Biden”.