Ka filluar sot Muaji i Ramazanit

Muajin e shenjtë të Ramazanit e kanë filluar sot edhe besimtarët myslimanë shqiptarë në Zvicër

Dita e parë e Ramazanit, muajit të agjërimit, ka filluar sot. Një ditë më parë, besimtarëve ua kanë uruar fillimin e këtij muaji edhe autoriteetet politike e fetare.

Në një mesazh që myftiu i Kosovës, Naim Tërnava u drejton besimtarëve, veç tjerash thuhet se “Ramazani është muaj që kultivon paqen, mirëqenien, dashurinë e respektin. Ramazani është muaj i pendimit e reflektimit, parime këto për të cilat bota e njerëzimi sot kanë nevojë më shumë se kurrë”.

Krerët politikë të vendit u kanë uruar besimtarëve myslimanë  agjërim të lehtë dhe njëherësh kanë bërë thirrje për rritjen e solidaritetit dhe respekti në shoqëri.

Muajin e shenjtë të Ramazanit e kanë filluar sot edhe besimtarët myslimanë shqiptarë në Zvicër. Me këtë rast Unioni i Imamëve Shqiptarë në Zvicër u ka drejtuar atyre një urim dhe përgëzim.

„Të gjithë besimtarëve muslimanë në Zvicër dhe në mbarë botën ua urojmë muajin e bekuar të Ramazanit, duke e lutur All-llahun Fuqiplotë për durim, qëndrueshmëri dhe vazhdimësi në ibadetet e begata të këtij muaji dhe duke e lutur të Madhërishmin për pranimin e agjërimit, të namazeve e të lutjeve dhe ibadeteve të tjera, të cilat ne mundohemi t’i bëjmë vetëm për hir të Tijin“, thuhet në urimin e Unionit të Imamëve Shqiptarë në Zvicër