Kantonet që po i vaksinojnë fëmijët në Zvicër

Një numër kantonesh zvicerane, përfshirë Cyrihun dhe Aargau, filluan vaksinimin e fëmijëve kundër Covid-19 të hënën, ndërsa disa të tjerë do të pasojnë më vonë gjatë javës

Të martën, më 14 dhjetor, Zvicra miratoi zyrtarisht vaksinat kundër Covid për fëmijët nga mosha pesë deri në 12 vjeç.

Në këtë grupmoshë në Zvicër llogariten rreth 600,000 fëmijë, shkruajnë mediat zvicerane, përcjell albinfo.ch.

Të hënën, më 3 janar, disa kantone zvicerane filluan administrimin e vaksinimeve duke përfshirë Aargau, Bernë, Graubünden, Uri dhe Cyrih.

Nga e mërkura do të nisin vaksinimet për fëmijët në St Gallen, Appenzell Ausserrhoden dhe Schwyz.

Vaksinimet do të fillojnë nga 8 janari në Schaffhausen dhe 10 janari në Uri.

Vaksinimet janë kryer tashmë në Zug (që nga 31 dhjetori) dhe në Lucern (që nga 1 janari).

Regjistrimi është i hapur në të gjitha kantonet për vaksinimin e fëmijëve.

Ekspertët besojnë se vaksinimi i fëmijëve është një hap thelbësor për të arritur imunitetin e tufës dhe për t’i dhënë fund pandemisë, përcjell tutje albinfo.ch.

A është vaksina e sigurt për fëmijët?

“Rezultatet e provës klinike tregojnë se vaksina është e sigurt dhe efektive në këtë grupmoshë,” tha ajo në një deklaratë.

Vaksina Comirnaty administrohet në dy doza prej dhjetë mikrogramësh me një interval prej tre javësh.

Një provë klinike e vazhdueshme me më shumë se 1,500 njerëz “tregon se vaksina Covid-19 ofron mbrojtje pothuajse të plotë kundër sëmundjeve serioze të shkaktuara nga virusi SARS-CoV-2 tek moshat 5 deri në 11 vjeç”, thuhet në deklaratë.

“Efektet anësore priren të ndodhin më rrallë se tek adoleshentët ose të rriturit. Ato përfshinin dhimbje në vendin e injektimit dhe lodhje, ose më rrallë dhimbje koke, dhimbje të gjymtyrëve ose temperaturë”, shtoi agjencia.

Në Shtetet e Bashkuara, rreth 2.5 milionë fëmijë janë vaksinuar. Deri më tani, nuk ka pasur dëshmi të efekteve anësore serioze.

---